Informatica e Poesia.

Ecco il contrastante connubio in cui si e' sviluppata l'attivita' di Lucio De Angelis in particolare negli ultimi anni. Egli nasce a Napoli nel Maggio del 1946 e lavora dal 1970 in un'azienda informatica. Sposato e padre di tre "splendide" figlie (" E figlie so' piezz'e core !), vive dal 1978 a Roma, dove svolge l'attivita' di istruttore (e non di distruttore ) nella suaccennata azienda informatica.

Ha scelto per voi navigatori queste tre composizioni:

Tre sillabe
Addo' currite ?
Chip e database


TRE SILLABE

Quanno te sento cu' 'sta voce argiento,
tutte l' anne ca tengo e, ne so' tante,
no !, nun 'nce stanno cchiu' s' e port' o viento
e so' guaglione cu' 'na foja d' amante !
Dint' a 'sta voce tu 'nce tien' a vita !
Si' l' aria e l' acqua ca me fa campa' !
E' proprio overo: si' 'na calamita
e io penzo sulamente a m' azzecca' !
Pecche' tiene tre sillabe int' o core,
ca poca ggente tene e sape ausa' !
Sei lettere pe' 'na parola: ammore
... e cu' 'sta molla 'o munno faie avuta' !


ADDO' CURRITE?

Addo' currite ? Chi ve porta pressa ?
Quant' anne so' ca nun guardat' attuorno ?
Nasceno ancor' e sciuri int' a 'sta ressa,
pure si a vote durano 'nu juorno !
Nun 'nce penzate cchiu' ma 'a mamma sgrava,
'e vacche fanno sempe ancor' o latte,
mentre qualcun' e vuie, schiattanno, pava !
Ah, Pateterno !, scassa 'sti buatte
e fall' asci' chist' ommo naturale
ca, si 'o prugresso nun curresse cchiu',
putesse campa' sulo 'e ll' essenziale,
penzanno quiet' a chillu Ddio lassu' !!


CHIP E DATABASE

Vanno parlann' 'e chip e database,
'e bit, 'e byte, 'e ram e floppy disk !
Te fanno veni' sulo 'e palle appese:
'e chesta vita nun sanno manc' e rischi !
Stanno assettati annanze a 'sti buatte,
ausanno sulo 'sti parole strane ...
e so' criature ca puzzano 'e latte,
pecche' vanno dicenno ca dimane
se farra' tutto annanze a 'sta tv,
senza capi' ca vita vera e' ammore
pe' 'n' animale ca nun sta in tv,
pe' 'nu nennillo ca te squaglia 'o core,
pe' 'nu malato ca cchiu' nun vo' suffri'
o pe' 'nu puveriello senza sorde,
ca va cercanno sulo 'e fa' capi'
ca e' felice si te n' arricuorde !!

...


Webmaster:
Umberto de Fabio
udf@mclink.it